Psalms 146
Kaem nu anananga Saonga Kari ko den
1O aleluya!Ani Kari Biya nup patawirikko!
2Ani tom suen biya Kari Biya ko nup patawirikko!
Tom ani marak bagasam mu te aninga Kaem ko wur iluwekko!
3Nina ali imi ko kari supuling nogo ko me nengemang ningi nunguning arukko.
Ali kari bo ta me ninga sangukko.
4Tom nuna kuesan mu nuna ali ningi namasan, ale ali gege ko geragasan.
Tom mutang te nunga ikia betemonko den nunguruwasan mu eng menaso.
5Bare kari Jekop ko Kaem nu sangukko baluwoso mu nu amilmilarukko.
Kari Biya Kaem nu taiti ali, se gagi mel suen la beteram.
Se kari noko gomang ningi nunguning mu amilmilarukko,
kari Jekop ko Kaem nu sangukko baluwoso mu amilmilarukko,
mu awuk, Kaem tom suen biya nu ko sinar taukko.
7Kari Biya mu nu kariimet nunga bita maguwusan mu nunga sangarso,
ale kariimet na inang ko kuawasan mu inang nungarso.
Ale kari talipara ningi anisan nu nunga sangarso se aratasan.
8Se kariimet nomotam sisira mu nunga nungurso se sor arigisan.
Nu kariimet ikup gisan ale ago tara patatangawasan mu nunga sangarso,
ale kariimet diram mu ninguru nunga kueso.
9Nu kariimet awar taira ale anananga ningi bagara mu nunga sinar taso,
ale imet gerewa se kuriang marmar mu nunga sangarso.
Bare nu kari memek mu nunga ikia bitawasan mu menawuso.
10Kari Biya nu tom suen biya ko king.
O Saion, nika Kaem mu tom suen biya king ko bagurukko.
Se Kari Biya nup patowaralko! Aleluya!
Copyright information for
WSK